O benestar das persoas con discapacidade, impulsado nun proxecto da Asociación Amizade
O “I Estudo DKV sobre os hábitos de saúde das persoas con discapacidade”, elaborado en 2019 por esta entidade, sinalou que polo menos o 55% das persoas con discapacidade practican un deporte ou actividade física de forma habitual. Con todo, o 17,8% dos enquisados sinalou que non poden cubrir os gastos que estas actividades requiren.
Segundo detallaba o informe, o factor económico é crucial para o acceso á saúde destas persoas. Máis do 34% dos participantes na enquisa afirmaba que este é o principal obstáculo á hora de adquirir hábitos de vida saudable. Esta situación pode levar ás persoas con discapacidade e con baixos ingresos a unha situación de vulnerabilidade e fraxilidade.
Así mesmo, está demostrado que a actividade ao aire libre e a atención psicolóxica en determinadas facetas aumenta o benestar e a integración en sociedade das persoas con discapacidade, como testemuña o estudo. Estes datos suxiren que fan falta iniciativas que lles proporcionen ás persoas con discapacidade o benestar que necesitan para manterse sans física e emocionalmente.
A Asociación Amizade de Pontevedra puxo en marcha, coa colaboración do Plan Social de Ence, unha iniciativa enfocada a dinamizar o día a día das persoas con discapacidade. Impulsou actividades lúdico deportivas, unha serie de visitas a lugares que contribúen a mellorar o seu estado de ánimo, así como asistencia psicolóxica para que poidan contar cun apoio ante inquietudes ou necesidades.
Amizade leva anos traballando por conseguir a plena inclusión das persoas con discapacidade en todos os ámbitos da sociedade, a través da defensa e promoción dos seus dereitos e da prestación de servizos que satisfagan as súas necesidades e expectativas. Grazas ao empuxe do Plan Social de Ence, puido avanzar nun proxecto para lograr o benestar físico e emocional destas persoas e afianzar a súa confianza, potenciando a súa integración na sociedade.
No Comments